陪伴香港人17年嘅大熊貓「佳佳」，今年10月接受安樂死離開咗我哋，終年38歲。佳佳生前係全球最長壽圈養熊貓嘅健力士紀錄保持者，海洋公園為咗紀念佢，噚日搞咗個撒灰儀式，將佳佳嘅骨灰撒喺佢「故居」前面，即係園內嘅四川奇珍館入口附近，同時喺撒灰位置上面，種一棵銀杏樹以紀念佢威水一生。
銀杏樹同大熊貓似乎大纜都扯唔埋，海洋公園行政總裁李繩宗就話，銀杏樹係古代銀杏類植物入面，喺地球仍然存活嘅唯一品種，算係植物界嘅「活化石」；加上佳佳故鄉四川廣元市青川縣唐家河，都有一棵樹齡超過一千年嘅銀杏樹，象徵健康長壽兼多子多福咁話，所以用銀杏樹紀念長壽嘅佳佳係最適合不過。