今年冬天遲遲未到，但嚟香港過冬嘅候鳥就陸續到達喇。香港濕地公園噚日起至明年4月舉辦一年一度嘅觀鳥節，以「雀鳥世界的秘密」做主題，介紹雀鳥各種有趣嘅身體特徵同行為。公園仲舉辦黑臉琵鷺展覽，係香港首次展出黑臉琵鷺骨骼標本。如果眼睇未夠喉，家長可以帶6至10歲小朋友參加Lego班，砌出黑臉琵鷺和灣鱷模型。
Lego迷很想要吧！不過積木模型係冇得帶走，活動完咗就要歸還公園，未來會開三班，包括下月14號、22號，出年2月嘅5號，費用全免，參加者可去濕地公園網站報名。觀鳥節其他活動包括觀鳥導賞團、「鳥骨能說的秘密」專題講解等。