新民黨葉劉淑儀前日宣佈參加特首選舉，公開話毛孟靜同梁耀忠為佢選特首打氣，搞到毛姨要漏夜喺社交網澄清，暗示葉劉將客套話當真咁講，噚日成班建制派喺立會拎住呢樣嘢嚟玩，而有現身葉劉參選嘅謝偉俊亦澄清，佢出席只係支持葉劉有體育精神，唔係支持佢做特首！
石禮謙：特首係聖旨揀
葉劉要選特首都要有150個選委提名，不過八方噚日喺立會見到唔少「梁粉」議員，似乎係花生友多過撐葉劉！好似民記「元秋」蔣麗芸，俾人問佢點睇葉劉參選大會時，元秋有骨咁話：「梁耀忠今日叫我加油呀！」民記劉國勳亦玩埋一份，講咗句：「no comment，加油！加油！」就快閃！
建制派議員入面，前日唯一現身葉劉參選大會嘅謝偉俊，唔知係咪怕好似毛姨、阿忠咁俾葉劉擺上枱，噚日澄清佢現身唔代表支持葉劉做特首，只係支持葉劉有體育精神，鼓勵吓競爭箒！仲話如果日後鬍鬚曾、林鄭請佢出席選舉活動，佢唔撞時間都會去。
建制派咁快想同葉劉劃清界線，葉劉噚日就短暫現身立法會，會後一度與地產服務界議員石禮謙密斟，仲不斷捽部iPad，之後就面黑黑離開。石禮謙話，葉劉同佢講到自己份政綱好好，所以叫葉劉畀份佢睇，但石禮謙就好坦白話，揀特首唔係佢哋揀，係天上揀、聖旨揀。石禮謙講到咁白，葉劉真係要諗諗，上面如果唔畀150個選委提名佢，到時點搵提名。
李八方
mailto:[email protected]