前立法會主席曾鈺成作為建制派元老級人物，早前自爆末代港督彭定康為佢著作寫序，點知有「正義朋友」藉呢樣嘢篤佢背脊。最近曾鈺成幫民主派嘅教育界立會議員葉建源新書寫序，仲要去埋葉建源嘅新書發佈會（圖），地點仲要喺教協，曾鈺成唔怕又俾「正義朋友」篤背脊？
不過八方今次覺得「正義朋友」唔好咁政治敏感喇，因葉建源本新書叫做《漢字變變變》，實情只係一本講中文字嘅書，絕無政治含意。不過曾鈺成去完之後，都喺社交網站貼相兼留言問，唔知自己有冇為葉建源帶嚟麻煩，真係幽默。
曾：收唔少議員贈書
曾鈺成噚日喺發佈會上話，以前都收過唔少議員贈書，仲好坦白講好多佢都冇睇完，只係放咗喺書架度。咁又係，唔少議員只係將自己嘅發言、專欄、立場之類嘅嘢寫成書，曾鈺成做主席多年仲聽唔夠咩。
但佢話葉建源呢本書佢有睇晒，仲送畀個孫睇㖭，今日見到個孫就會問吓佢睇成點。老曾咁撐本書係有原因嘅，一來佢對漢字有興趣，二來係多了解漢字發展，既可以減少爭拗，亦可以減少錯字。唔講唔知，原來老曾打字都係用倉頡輸入法，仲自豪打字快過好多人，唔啱搵日同每日都打字嘅記者比試吓？