葉劉淑儀前日宣佈參選特首，佢張「贏返香港」選舉海報，將「贏」字上半部同英文「win」結合，驟眼睇變咗個吂字，以為係「亡返香港」，成為網上熱議，仲多人講過佢份政綱。
葉劉噚日上電台解釋話個設計由青年設計師負責，佢好喜歡紅色撞藍色，同「贏」字中間有個心，冇諗過喺網上會有咁多詮釋。
𠵱家有咁多人覺得設計唔多好，葉劉又會唔會修改個海報設計？葉劉話會交畀設計師跟進，亦不排除會有所「改善」。對於有人話「贏返香港」係翻炒葉劉立會選舉時口號，葉劉似乎冇意思改，話呢個口號喺當時落區好受市民歡迎，佢希望贏回和諧、團結、青年人前途喎。