昨天香港討論區突然有人講起1993年某橡皮糖廣告歌。
朱古力邊一種代你包起橡皮糖果，鬆一鬆的果味令你好清爽
朱古力邊一種別有新感覺
請記住明治××
請記住明治××
朱古力 橡皮糖！
唱着歌，除了有「初戀的感覺」外，那個「××」到底是甚麼呢？大人估是「貼紙」、「BB」、「DeepDeep」、「缺點」，結果作者Christopher Loak蒲頭解畫：「明治DD係答案，DD係呢種朱古力的製作過程，當年廣告商指定要寫入去歌詞！利申，係我填嘅！」
佢，係填詞人因葵。
「其實我用了大概用了半小時填份詞，因為他指定30秒內，又要有朱古力又有橡皮糖，又有明治DD，又要好好食，又要賣到重點，賣藥般，其實得幾隻字位。」好笑是剛才傳回自己的facebook時竟有人認是他作曲的，「原本這歌是……（唱起日文來……）咁，像是日本兒童演歌的感覺，怎會是香港人作呢？其實這世界好有趣，好多人見到一些事會順勢抽水或認這認屎認屁。」
他是八、九十年代著名詞人，那時的《紅色跑車》、《只願一生愛一人》、《Oh My Crystal》、《西遊記》、《大時代》，仲有呢隻你一定記得，早前達哥一唱翻紅，歌詞衰衰咁，1999年鄭少秋的《香港料理》等都係佢作品。裏面有句：「我焗住碌卡個心痛到癲，癲到幾乎燒喇叭！」點解？因葵：「燒喇叭，就是癲到幾乎×那媽囉！嗰陣秋官入屋O架嘛，咪填啲諧音算囉！」
冇諗過23年前一隻朱古力歌俾人記咁耐，又冇諗過簡單一隻諧音rap俾人剿番出來玩，不過佢自己最記得的，倒是六十年代一隻廣告歌，佢鍊高喉嚨升key，「可能是我幼稚園時候的了。意大利大利牌Zanussi，雪櫃電視機，最好Zanussi，洗衣機洗碗碟機，家家用過大吉又大利……」嗰陣的廣告歌，簡簡單單，威力驚人。
記者：陳慧敏
