唔好以為「雞排妹」頭號粉絲朱寶生淨係對「雞排妹」有衝動，其實佢對政治同樣有幾分衝動。大概八﹑九歲，寶生見屋企樓下嘅議員辦事處有康樂棋同大富翁玩，以為只係一般嘅社區中心，就誤打誤撞咁幫咗禮義廉。錯，好閒啫；最緊要係知錯能改呀嘛。問到佢幾時醒覺，寶生話：「反高鐵嘅時候係轉捩點 ，由民建聯跳番出嚟，參加咗啲反高鐵唔同嘅社會運動。」
離開禮義廉後，一直希望為香港帶嚟改變嘅佢，積極參與社運，當中包括2014年嘅雨傘革命：「想香港改變，為番我哋土生土長嘅香港人，會有番啲福利囉。 2014年佔領嘅時間發生咗咁多事，咁長嘅日子，當時係想爭取呢個真普選。」為咗信念，寶生走到最前抗爭，佢更加因為社運，賠上自己嘅前途﹑時間同埋金錢：「有啲朋友，年初五嘅時候要上庭，就過去聲援佢哋。同對面保衛香港嗰班有少少衝突，咁就俾人拉咗。個社會服務令160小時，差唔多半年時間，即係基本上係浪費咗一年嘅時間。」
曾經，寶生迷信上街真理會達到，佢更話過「成功之前，絕對不要放棄夢想！」但估唔到經過咗今次案件，「淆底」同「心灰意冷」出現咗喺寶生嘅腦海中：「最大嘅感受....有啲後悔囉。好多朋友因為走出嚟前線抗爭，由佢哋俾人拉，去到今日有無數自己嘅朋友喺監獄裏面坐緊，但係冇人去幫佢哋，冇人去睇佢哋，我自己覺得對社運心灰意冷囉。我(o依家)最多會喺facebook度留一兩句言啦，但係唔會再出嚟囉。」
寶生嘅經歷，確係令人不勝唏噓；面對不公平同不公義，試過、努力過，仍然爭取唔到，係咪就咁放棄？係咪從此認命？寶生嘅選擇，未必代表你。
採訪：植詠珊（Cathy）
攝影：馮峰、Neo
剪接：Roy
場地提供：香港摩天輪