車路士好人好事，所以十全十美！講嘅係藍戰士喺周三作客新特蘭場英超聯，佢哋賽前同黑貓一齊達成咗一名五歲患癌嘅新特蘭小球迷願望，之後就以1:0小勝黑貓，攞到聯賽10連勝，目前喺聯賽榜領先，肯定可以成為聖誕冠軍。
患有一種罕有兼會影響神經細胞癌症嘅新特蘭小球迷巴特利羅利，由於癌症再次復發，未來幾周就要開始隔離，佢嘅願望就係喺光明球場入波，所以喺新特蘭迎戰車路士開波前，兩隊就邀請巴特利一齊熱身，車仔前鋒迪亞高哥斯達仲教佢點射波，等佢可以射破門將比高域嘅十指關，場面好感人；喺賽事戰至五分鐘嗰陣，兩隊球迷仲一齊為巴特利鼓掌。
可能好心有好報，車路士就憑法比加斯一箭定江山，以1:0擊敗黑貓，聯賽10連勝，仲以六分拋離次席嘅利物浦，肯定可以成為今季聖誕冠軍。過去六季，有五支聖誕冠軍可以順利奪標，車仔本身亦試過四次成為聖誕冠軍之後捧盃，認真好兆頭。
