恒隆地產（101）董事長陳啟宗鍾意賺錢，數口自然精喇，而佢本身都好支持數學發展，更喺12年前，同中大數學科學研究所所長丘成桐，一齊創立「恒隆數學獎」。獎項旨在畀本地中學生參加，研究唔同嘅數理題目，而噚日舉行最新一屆頒獎禮嗰陣，陳啟宗個囝囝，集團執行董事陳文博亦有捧場。
陳文博好謙咁話，細個讀書嗰陣，自己嘅數學科麻麻地，而參賽者研究嘅題目，更加係一個都唔識。
佢笑笑口講，雖然遺傳咗爸爸啲基因，但數學呢方面真係唔多認識，真係好可惜咁話。佢又話其實陳啟宗計數好快，自己同爸爸比，「應該係佢叻啲」。
陳文博自從2010年加入家族公司後，一路由低做起，直至今年11月，先至入到董事局，忙咗好多，主力睇建築同維修，中港兩邊走。一問起特首選舉，佢就即刻封嘴，但笑容滿面，唔似陳啟宗咁板起塊面。