好多時淡市冇人爭買樓，蘇州過後又爭過。正所謂「瘦田無人耕、耕開有人爭」，正如有人排隊買雞蛋仔，對街另一檔完全唔使排隊又平啲，都唔會過另一檔買。「有人排隊先係好嘢」，呢啲咪叫做羊群心理，多人買就咪執輸，人買我又買；市場有規律，通常鍾意爭。
每逢淡市有好多專家都建議讀者睇定啲或唔好買住，股壇通常叫人望更低的位才買，但永遠唔會到呢個低位；當形勢轉好後便叫人追，還要到某個位便要止賺離場，正如滙豐早前便有大批分析和專家叫人追買，最牛還看70元或以上。股票嘅嘢唔係升就係跌，有閒錢先好買，仲要瞓得着，買滙豐來短炒，根本嘥錢兼嘥時間。
至於樓市淡市一樣有好多專家話睇定啲，一時又話價值偏高應該要跌，未來新供應大把貨，美國加硬息，叫買家不要𠵱家入市高位接棒或者越買越跌；當市況轉好時又轉口又話供應來不及，美國加息不等同香港會加，又話加上辣招縛住令到二手流轉低，有貨便要買。正所謂點講都唔會輸，神又係佢、鬼又係佢，呢班「地產神棍」，信佢一成，雙目失明。
點解要買樓？有需要咪買，當然在市靜時會有筍貨，但呢啲貨不會在我面前出現，睇得啱、能力可以嘅話咪買，由自己揸莊。冇人有水晶球，會知道個市何時見頂回落，大眾通常摸頂容易摸底難，只好怪自己唔夠眼光或冇耐性。
劉兆昌
資深地產傳媒人
http://www.HKLau.com
本欄逢周五刊出