特區政府同貿發局每年1月主辦嘅「亞洲金融論壇」（AFF），自2007年香港回歸十周年籌辦以來，唔經唔覺，明年已經係十周年嘞。雖然論壇嘉賓，唔似今年咁，請到聯儲局前主席伯南克咁重量級數，但明年都有星級講者，包括曾被譽為「世上最聰明投資者」之一嘅PIMCO前行政總裁埃利安（Mohamed El-Erian）。
呢位仁兄，現為安聯集團首席經濟顧問，曾任奧巴馬全球發展委員會主席，佢最近仲評論特朗普用債務擴張，刺激美國經濟增長有得諗，其著作《When Markets Collide》，入選過《紐約時報》及《華爾街日報》暢銷書榜㖭。
有見金融科技（fintech）係大勢所趨，貿發局副總裁Raymond（葉澤恩）同華華講，明年論壇酒會，將會有機械人擔任司儀，透過人工智能同雲端支援，robot嘅面部表情同反應，隨時勁過真人show咁話！