臨近年尾，最搶眼新股非美圖（1357）莫屬，佢除咗有大緊肚嘅Angelababy做品牌大使之外，竟然仲搵到富豪酒店（078）太子女羅寶文同「低調殼王」高振順做獨立非執董，寶文BB噚日仲講笑，叫華華揀張靚相兼美圖一下先好出。
代號1357寓意天下無雙
老實講，寶文BB本身係靚女富二代，冇理由要用美圖，而佢亦好少幫其他公司做董事，多年來只係擔任家族上市公司富豪、百利保（617）同世紀城市（355）嘅董事，今次忽然睇上美圖，以為佢都係畀例牌答案，話識得董事長蔡文勝云云。點知佢畀嘅理由仲特別，佢指，香港股市冇一間中外關注、但仲係蝕緊錢嘅上市公司，美圖蝕緊錢都可以喺主板上市，佢覺得應該支持一吓，於是應承做獨董。噚日一早佢打扮得靚靚出席上市儀式，不過就冇同Angelababy認真合照囉。
「低調殼王」高振順就更少現身上市儀式，難怪蔡文勝一班管理層都捉住佢selfie，之後會唔會美圖一下就唔知嘞。
至於紀念品，美圖冇整甚麼變靚神器送畀港交所（388），只係用美圖員工相，砌成美圖英文名meitu整成相架。公司股份代號1357就寓意勇攀高峰（數字不斷遞增咁解）、天下無雙（無雙數）喎。
李華華
mailto:[email protected]