長和系多女將就係人都知，原本做開長和（001）副董事總經理兼執董嘅周胡慕芳今年8月退下來後，噚日長和公佈，搵來公司法律總監兼公司秘書施熙德接任做執董，周胡慕芳轉為非執董。
64歲嘅施熙德係執業律師，1989年加入長和，係老臣子之一。佢擔任長和嘅公司秘書多年，喺業界頗有地位，做過幾屆香港特許秘書公會（HKICS）會長。
幾年前，華華曾於公會活動見過施熙德，佢好落力推廣，希望大家唔好以為特許秘書只係負責打字，其實做得特許秘書嘅人都係專業人士，好似佢本身就係律師，要了解公司法、財務、金融等公司管理細節，仲要畀意見董事會。
睇番長和通告，施熙德做執董、法律總監兼公司秘書嘅年薪有405萬元，另有花紅，高薪過做官喇。