目前香港興起一個「中國歷史」科熱潮，不過唔係好大啫，中等熱度啦，大概係對梁游兩位講港獨嘅膝頭哥反應，由建制派推動嘅。立法會議員以前唔興講中國歷史，特區政府教育局視中史科為閒科，毫不重要，一聲教育改革便廢之哉。點知為了反港獨，中史科竟然成為武器，立法會通過香港初中中國歷史為獨立必修科動議，吳克儉局長毫不面紅咁講：「教育局一直重視中國歷史教育」，真係笑死人唔駛本。
重視喎，教乜呀？據報，初中歷史課程須大幅度修訂，要刪除歷代興替興衰史，初中一教遠古至唐，中二教五代至清末，中三就要講到現代史與香港史，當初中學生係電腦記憶體兼備大數據分析功能，實行教死老師，讀死學生，以後視中史為畏途。
唔講內容如何嘞，有冇教科書俾學生讀都成問題。近年教育局好大喜功，力推電子教學，幾年來打壓文字書商，令書商心灰意冷，而中史科更係冷門科，得幾千人考DSE中史，書商出版中國歷史教科書，根本難以回本。開發一本新教科書，編寫全新課程，你估唔駛錢呀，如果要出埋電子版，更加成本昂貴，教育局咪口輕輕，盲推初中中史必修而到時發覺無書可教，搞到學生家長怒吼示威！不過到時應該唔係吳克儉嘅事咯，夠膽接任教育局長一職嘅仁兄或仁姐，要磨利把嘴，拉緊面皮至得。
上星期見到一位老師N竟然捨得換手機，唔再用幾年來機不離手嘅三星Galaxy，買咗部全新iPhone 7，於是問佢點解咁破費？老師N話：「教育局派教育官來學校推廣電子教育，電子資訊，電子教科書等等，聲言以後要與教育局同步，得到數碼訊息嘅話，要用iOS版，目前未有Android版，其實即係話叫我地改晒用iPhone，放棄所有三星，LG，Sony，華為，小米，HTC手機啫，所以我唔轉用iPhone唔得！」
哦，原來教育局化身成為Apple嘅產品推銷代理，理應獲得Apple獎賞，例如向全港中學贈送iPad或MacBook Air。老師N嘆一口氣：「你就大想頭嘞，我間學校唔夠iPad作教學用途，要學生家長自己買。」學生家長冇錢又點？老師N苦笑。呢樣嘢又係製造貧富不公，容易挑起民粹，教育局唔知有冇為佢地嘅政策做社會衝擊（social impact）評估嘅，所有小事加加埋埋就會成為刺激學生上街之動力，唔該諸位官老爺推出政策之前，睇清楚全盤大局。