石油股呢兩日突然強勢，究竟之後有冇機會承接濠賭股，成為強勢板塊？
其實油價急跌，過往每幾年點都發生一次，唔代表石油行業永不翻身。由1985年到𠵱家，紐約期油已經係第六次兩年內出現五成以上嘅跌市，唔計今次嘅五次當中，有四次其後可以重拾長線升勢，只得一次呈現長期反覆嘅走勢幾年咁耐，但冇一次短期內再大幅下跌，論往績計，油價回升機會較大。
當然，油價自從今年1月低位每桶26美金至今，已經反彈1倍，不過目前只係每桶52美金，基數唔高，要再升當然並非冇空間。
論估值，中石油（857）目前市賬率0.83倍，在於一間唔會執笠、有中央支持、經營淨現金流持續強勁、數以十萬計員工跟住搵食嘅公司，除非石油一夜之間失去主要用途，否則呢個估值，都唔能夠叫做貴。
中石油唔似內銀股有高槓桿、假數危機，供股等等攤薄股東權益嘅措施不太可能發生，如果市場預期國際油市正常化，即使業績改善程度有限，對於基金嚟講都有長線價值，至少相比內銀股更買得落手。
中石油突破今年阻力位6蚊，成交增加，確認由弱轉強，咁啱資金由濠賭股、騰訊（700）流出，中石油有條件接力炒上。
晉佳
http://fb.com/advanceguy1