其實唔單止中國資金，亞洲唔少其他國家嘅資金都湧向歐洲球壇，好似馬拉加之前就獲卡塔爾財團注資，華倫西亞早前亦俾新加坡富商林榮福收購。華倫西亞假假地都拎過西甲冠軍，早幾年仲係歐聯常客，出產過韋拿、大衛施華同桑馬達等巨星，不過家陣得番個傳統招牌，認真唔夠照，今季睇怕要為護級而努力。
華倫西亞星散，林先生愛女林慧俐就好落力幫華倫製造新聞，事關佢樣靚身材正，仲傳過同澳門賭王囝囝拍拖㖭。林小姐成日喺社交網站曬靚相，又不時陪老竇入球場，吸引唔少男球迷。好可惜林小姐本身係一個曼聯鐵粉，華倫之前請曼聯名宿加利尼維利執教，都唔知佢有冇份落決定；佢又不停喺個人instagram大晒曼聯精品以及同C朗合照，搞到華倫球迷越嚟越火起，甚至有球迷「圍攻」佢instagram。咪睇林小姐弱不禁風咁，喺鍵盤面前一樣係戰士，叫球迷唔好理佢私生活，大不了唔好做華倫球迷，搞咗單關公災難出嚟。
其實小弟都有份見證華倫盛世，當年靠文迪達、安古路同簡尼沙利斯等猛將，連續兩年殺入歐聯決賽。不過，林生就似生意人多啲，有啲價值嘅球星好似柏高艾卡沙、安祖高美斯都要賣咗去巴塞隆拿，今時今日仲要靠拿尼，你估佢仲係曼聯時期同C朗雙翼齊飛嗰個拿尼咩，𠵱家淪落到西甲排17位，降班都唔奇。
文：牽牛