發達已經唔係年輕一輩嘅agenda，Banker的後裔各自各精彩。中銀信用卡前總經理蘇誠信（Dickson）嘅寶貝女Priscilla So，就選擇追尋時裝夢，近年創立名為Sketcharound嘅自家品牌，喺本港時裝界略有名氣，亦參加過唔少花生騷。
Priscilla今年廿幾歲，畢業於英國倫敦時裝學院，學成歸來後，曾於一間本地時裝企業待過一陣，之後創立Sketcharound，香港喺六間舖寄賣，包括K11商舖。
蘇誠信指，呢個品牌係走Unisex路線，男又着得，女又着得，而且重視質素與剪裁，樂基兒、陳奕迅、郭偉亮（Eric Kwok）、任賢齊等都有着過。
華華走去K11間舖睇過，一件酒紅色褸賣2,820元，店員話，呢個牌子近排賣得唔錯，仲有內地客慕名而來。
講番Priscilla，蘇誠信話，由細到大，父女關係好融洽，有講有笑，仲會一齊去旅行，老豆會拎埋紅酒、雪茄，同個女一齊嘆，阿女亦有同佢分享感情事。蘇誠信大爆阿女單身，如果有成熟好男人，不妨介紹下咁話。
