梁詠琪 (GiGi) 為肩負生育重任，前年放慢工作步伐。囡囡Sofia轉眼成長，GiGi今年重開turbo，唱片、電影《骨妹》、配音動畫，緊接20周年巡迴演唱會，樂做兼顧家庭及演藝事業的超級媽咪。臨近聖誕，她終可放鬆一下，計劃出埠共度三口之家的第二個佳節，教開始懂事的囡囡西班牙過節習俗，並準備迎接女兒「Trouble 2」兩歲反叛期，「我覺得係一個過程，情感抒發係唔可以壓制，只能夠control佢嘅自律性、行為。」
採訪：趙潔恆
撰文：林嘉慈
造型：趙潔恆、林嘉慈
攝影：郭賢興
攝錄：李祉澄、林德雄
化妝：Andy Leung of ndnco
髮型：Nick Lam of Pi4.com.hk
今年是梁詠琪一家三口共度的第二個聖誕節，雖然跟隨西班牙籍老公Sergio傳統，較着重下月6日的三王節，但仍把握假期讓一歲多的囡囡感受本地節日氣氛，教爸爸家鄉的過節習俗，「老公細個除咗會掛一隻襪，等聖誕老人擺禮物之外，臨瞓會喺聖誕樹旁邊準備曲奇餅，同埋一杯奶。」老公深信為聖誕老人拉車的鹿會口渴、肚餓，「如果起身見到俾人飲咗、食咗，證明聖誕老人嚟咗。當然都係爹哋、媽咪食㗎啦，但呢個都係佢細個嘅一個情懷，我哋都會做。」
囡囡愛人陪
在GiGi去台灣拍戲前，一家人會先去短途旅行、約朋友聚餐，讓女兒接觸更多小朋友。對囡囡而言，只要有父母陪，日日都是假期，「其實細路仔冇乜要求，你同佢玩吓煮飯仔，帶佢落樓下個公園仔瀡滑梯一日，佢就已經好開心。」假期，對大人才有感覺。
巡唱好圓滿
紀念入行20周年的「梁詠琪2016好時辰演唱會」完成三分之一，過去多個周末犧牲家庭樂，在內地落力唱，現場歌迷的反應卻是今年給GiGi最大滿足感的事，「睇番佢哋留言，話好似回憶青春時代，覺得有呢個concert係好圓滿，自己覺得所有嘢都好值得，對支持自己咁耐嘅歌迷一個交代。」
巡唱同時令GiGi有新體會，全程抱住享受心態去演出，「有咗家庭後，個人冇後顧之憂，踏實咗，生活更自在、舒服，加埋佢哋畀我嘅支持，令我更專心去做嘢。」工作過程亦助她認識自己，變得成熟勇敢，「唔會再依賴旁邊嘅人、公司好似以前咁保護你，有事情就自己解決，當事情迎刃而解，又拋諸腦後時，可以focus番喺工作上。」
棘手反叛期
GiGi囡囡看完巡唱的深圳頭場後，講足幾星期，「佢話：『Wanna see mama dancing and singing like this.』一見到手機就話要睇Mama dancing，我有時要人肉表演畀佢睇。」她續說：「佢見我有套衫，有蝴蝶喺頭上面，佢又話：『I want some butterflies on my head.』我有首新歌叫《My Little Sofia》，每次聽到佢都掩嘴笑，認得好快。」
囡囡開朗、學習能力高，GiGi並沒有刻意催谷，間中才帶她上playgroup，反而着重家庭教育，培養價值觀，常向她提問來引導思考，「有啲周末，爸爸帶佢去睇聖誕燈飾，我做完嘢返屋企，爸爸就會引導佢講成個weekend做咗乜、見到乜，我發現佢好鍾意好似新聞報道咁講一次。」
還有兩個月，囡囡就踏入「Trouble 2」，GiGi暫時不覺女兒反叛，「聽人講係好棘手嘅，但我覺得都係一個過程。佢表達不滿、主見都係正常，始終每個人有佢嘅想法，要畀佢知道我哋知道、尊重佢感受之餘，有一啲rules係一定要跟。」講得頭頭是道，自認經驗不足的她全靠睇書學教女，「情感抒發係唔可以壓制，只能夠control佢嘅自律性、行為。」讓她自由抒發，才有健康童年。
展望2017
2016年快將完結，GiGi對世界大氛圍感受甚深，「其實2016年，覺得個世界都幾亂，例如難民、IS問題，𠵱家又講緊氣候暖化問題。」她希望2017年情況會有所改善，「個世界太平啲，唔好咁亂，都係為下一代着想，因為佢哋會面臨更多國際社會問題、轉變，希望到佢大個時，個社會、地球健康啲，所有嘢都穩定啲。」
更多精采時尚內容，盡在 http://add.appledaily.com 。