數字王國（547）今年中收購謝霆鋒後期製作公司，搵佢做大中華區主席，咁佢女友王菲年尾開騷，雙方即刻有合作，由數字王國負責拍攝，粉絲可以網上睇直播。
數字王國將於演唱會當日，以超高清360度VR攝錄機全景拍攝，通過騰訊視頻Live Music、微鯨VR手機應用程式同互聯網電視應用平台，全球直播演唱會。據聞，香港都有得睇，只要打開騰訊視頻就可以睇到2D版，至於VR版收費就有待公佈。
數字王國仲擺咗王菲video上facebook專頁，以清爽短髮示人嘅王菲話，今次係全球首次VR直播演唱會，叫大家12月30日一齊「幻樂一場」！可惜，呢個消息暫時對數字王國股價冇乜刺激作用。