雖然已經宣佈唔爭取連任，但餘下任期仲有約七個月，特首梁振英點都要捱埋佢嘅，而且如果撐政務司司長林鄭月娥代佢出征，咁都繼續要曝光力箍支持以便過票。
所以已成明日黃花嘅CY噚日亦出動，同多位主要官員接種季節性流感疫苗，呼籲市民盡早接種。參與嘅包括最近升呢做署理財政司司長嘅陳家強、勞工及福利局局長張建宗、政制及內地事務局局長譚志源等。睇見CY笑意盈盈，相信呢一針唔算痛，肯定易捱過被中央DQ。
而梁粉醫生、食物及衞生局局長高永文亦有同場相伴，佢話政府擴大疫苗資助計劃同政府防疫注射計劃，六個月至未滿12歲兒童、傷殘津貼受助人同孕婦都可獲免費或資助接種。
截至本月11日，兩計劃已為合資格人士接種約491,000劑季節性流感疫苗。