前兩日同牽牛兄講起，亞洲資金不斷湧入歐洲球壇，暫時最威水嘅係王健林有兩成股份嘅馬德里體育會，雖然聯賽成績差咗，但都入到歐聯淘汰賽；王健林最近仲冠名贊助埋球隊新主場做萬達大都會，網民都講笑話馬體會變咗做「王家馬德里」。不過，今季先俾蘇寧收購嘅國際米蘭就繼續唔掂，記得當年佢哋嘅外號係球星墳墓，但呢幾年變做教練墳墓，邊個教都衰。
早十幾年，國米可以話係球壇公認嘅球星墳墓。不過，近年國米已經搣甩呢個外號，因為自從莫拉堤冇心玩隊波兼賣盤後，國米就已經買唔起球星，變成教練墳墓。自從摩連奴為國米贏得最後嘅輝煌，球隊近六年竟然換咗九個教練咁多！加斯柏連尼喺2011年教咗三個月就被炒，但佢今季教阿特蘭大教得唔錯，排名仲高過國米；執加斯柏連尼手尾嘅雲尼亞里，當年教唔到季尾就俾人炒，但上季佢幾咁風光，幫李斯特城奇蹟奪英超。
至於馬沙利教拿玻里嗰陣不知幾勁，後防踢三中堅，前面有卡雲尼同咸錫攻堅，但一入國米深似海，教咗一季多啲就被炒；佢今季喺英超帶屈福特排中上游，逼住曼聯㗎。所以小弟想同法蘭迪保亞講句唔使擔心，雖然你誇張到帶國米喺歐霸盃小組包尾，輸畀隊我永遠唔記得全名嘅比亞斯華夏普爾，但睇番呢幾位教頭都重獲新生，相信迪保亞都可以。
文：咖喱