「共享經濟」、「大數據」、「雲端」、「區塊鏈」近年成為一班上市公司高層口中嘅潮語，一個二個都想用科技去包裝公司。就連收租佬金朝陽（878）都潮起來，噚日舉行記者會話推出一個共用工作空間（Co-working space）嘅App。
記者會由金朝陽太子爺陳慶達主持，佢雖然加入公司逾十年，但平日極低調，難得呢次由佢主持大局，傳媒都有啲期待，點知佢甩甩咳咳讀稿，之後話冇帶卡片，跟住仲趕住閃。被傳媒追訪時，佢拋低兩句「我唔可以、唔可以、一定唔可以再講㗎喇」就走人。
金朝陽話晒係一間市值40億元嘅上市公司，希望太子爺下次從容啲喇。