香港今年「獨」佔鰲頭，年度風雲人物唔少得「獨」派。Google公佈今年嘅最熱爆本地時事人物搜尋排名，結果一啲都唔令人意外。被DQ議員資格嘅青年新政游蕙禎榮登一姐，無論衣飾如短裙、抑或無房扑嘢論等言行，都係網民至愛熱話，難怪游BB成為最多人用Google摷嘅時事人物。
排第二嘅係立法會票王朱凱廸，選戰一鳴驚人，仲受死亡恐嚇，相信因此令市民更關心佢嘅動態。由年初一騷動到新東補選，本民前梁天琦都有唔少粉絲，近期少咗露面嘅佢排第三，而喺佢之後嘅就係新民黨嘅容海恩。佢選舉時候金句同笑料不絕，搜尋佢嘅新聞都係放鬆妙法。
排第五嘅終於唔係政界而係體育界，牛下女車神李慧詩雖然里奧失金，但佢一句「我真係盡咗力」牽動全城，唔少網民一直為佢打氣。