退休法官胡國興唔理中央係咪會祝福，一鼓作氣搶閘宣佈選特首，噚日仲公佈埋政綱，係咪快人一步、理想達到？
相信未必咁易，但佢有前特首曾蔭權重臣、前新聞統籌專員何安達Andy幫手，卻令到大家覺得詫異，以Andy同煲呔嘅關係，乜佢唔會親曾俊華多啲咩？但佢竟然走咗去幫胡官搞選舉。
Andy自我解謎，佢話約莫十月底、當胡官正式脫離法官行列後就收到對方電話，邀請幫忙搞選舉，憶述當時佢仲喺澳門坐緊船返香港㖭，而最後答應幫胡官手，係因為胡官政綱最着重嗰個「正」字，令佢都覺得香港係時候重回正路。
雖然身在唔同陣營，Andy話心儀嘅下屆特首除咗胡官，都包括鬍鬚曾㗎，有公平嘅競爭就係最緊要。而Andy嘅囝囝噚日都在場，原來啱啱湊佢放學，順道帶佢去現場。