鐵甲奇俠fans注意！唔使等到下年1月11號先知迪士尼個「鐵甲奇俠飛行之旅」玩乜，因為蘋果動新聞已經搶先去咗試玩喇！呢個全球首個引入迪士尼樂園嘅Marvel設施，位於明日世界，除咗有得坐Tony Stark架新機，仲有一比一真人Iron Man長駐同大家影相傾偈！
記者：黃芷蔚 攝影：Neo
為咗令大家當日玩得方便快捷，你哋去到會見到兩個遊戲入口：左手邊「鐵甲奇俠裝備展」係可以面對面見到鐵甲奇俠，影相、傾偈甚至攬攬都no problem！佢出場非常有型，把聲同Tony Stark一樣，亦同Tony一樣咁多口水，聲稱聽得明廣東話同普通話，不過反應就明顯冇「幸會史迪仔」嘅史迪仔咁快，呢個設施主要係畀大家集郵同聽吓Tony Stark把聲。
出番去右邊大家會見到「鐵甲奇俠飛行之旅」，場內以「史達科技展」(Stark Expo)做主題，沿路會經過五個展廳，將「史達工業」經典作品好似美國隊長裝備藍圖同首個Iron Man設計圖show晒出嚟，抬頭會見到Jarvis同亞洲總裁黃小姐嘅短片，介紹最新發明。睇埋幾部『鐵甲號』飛行車，終於見到真係可以坐嘅Iron Wing喇！
Iron Wing，即係「鐵甲奇俠飛行之旅」，一共有5個飛行艙，每個裝到45人，留心一睇，入場前嘅教學片係有Marvel之父Stan Lee客串。遊戲要大家戴上3D眼鏡同扣安全帶，劇情正正就係大家試坐飛行車時，有人通知鐵甲奇俠黑暗勢力Hydra班手下襲港，大家架「飛行車」開始模擬飛行，跟住鐵甲奇俠飛過青馬大橋，經過香港街頭，打去維港，仲會見到香港「史達總部」。儘管過程只係4分半鐘，但由於街景像真度高，加上45個人嘅座椅會一齊前後左右移動，都幾刺激，值得推介。
如果怕頭暈但又想扮鐵甲奇俠，可以去隔籬嘅精品鋪頭玩模擬鐵甲奇俠體驗，呢個就類似之前希慎個展覽，店內仲有唔同Marvel人物包括蜘蛛俠產品，Fans可以留意香港特別版系列。
最後提大家唔使衝去搵Fast Pass，因為呢個設施開放初期，Fast pass只會送畀樂園酒店住客㗎咋！