《蘋果日報》最近加咗一蚊賣8蚊，雖然比其他報紙貴一蚊，但唔少讀者繼續支持，令《蘋果》有動力做到最好，而《蘋果》嘅印刷同事都表現出色，最近獲太平洋地區報紙出版者協會（PANPA）Single Width Press組別嘅「印刷技術卓越獎」（Technical Excellence Award）大獎，表揚《蘋果》嘅印刷水準達到國際水平；而台灣《蘋果日報》同台灣《爽報》亦都同樣獲得呢個「印刷技術卓越獎」，港、台同步攞獎，認真可喜可賀。
除此之外，世界報業和新聞出版協會（WAN-IFRA）前幾日亦公佈咗亞洲媒體大獎2016名單，《蘋果日報》獲得15萬份以上印刷組別嘅最佳印刷獎銀獎，同時亦繼續成為國際報業色彩品質協會（INCQC）2016-18年嘅認可會員。