怪事年年有，今年特別多！
好似隻「越南河粉股」膳源（1632），林均恆（Jonathan）呢位仁兄上周四接近摸頂，以每股16.6元大手增持後，翌日見隻股暴跌一半，竟然拎480萬元以半價再掃貨，全世界都知道佢做緊嘢，好鍾意食越南河喇。
根據聯交所資料，林均恆上周五，以平均價8.59元，再買55.8萬股，佢兩日合共斥資5,000萬元增持膳源。膳源噚日收報9.28元，頭一批貨仲蝕緊2,000萬元。
林均恆究竟係乜水呢？根據公司註冊處資料，佢開過15間公司，部份已經解散。噚日去過佢間叫「青木金融投資」同「青木軟體開發」嘅公司，未見人影，門口望落似係準備搬。據講，十年前，林均恆出版過一本叫《Investor》嘅投資雜誌，但好快停刊。
林均恆報住太古城，名下冇自住物業，只有九龍灣常悅道恩浩國際中心一個寫字樓單位，於2013年以2,118萬元買入，獲永隆銀行承造按揭。換句話講，佢增持膳源嗰手貨，輸緊一個寫字樓！