12月12日上午，一位觀眾打電話到NOW 332台的「時事全方位」節目，表達對林鄭月娥「唔選又選」的轉軚極度不滿。一位記者於星期日（12月11日）在馬場碰到左丁山，也說：「我本來好信林鄭說話嘅，但係佢在星期六見傳媒，唔止一次講『此一刻未有準備』，又話感到有巨變，可能重新考慮選特首，其實即係想選啦，乜佢又係好似梁振英咁講：我N屆唔選特首。我好失望呀，林鄭話過唔選特首，唔止一次，即係話佢講大話唔止一次！」
左丁山叫呢位記者少安無躁，人講你又信，盞激氣嘅啫。林鄭以前講過好多嘢，明報（12月11日A2版）翻出佢在2015年到2016年11月，共四次談及任期滿後退休，到英國探望兩個兒子。依家大家明白了，林鄭退休嘅大前提係梁振英出任做特首至2022，佢知道冇希望更上一層樓，又唔想繼續為梁特賣命，於是猛咁講2017年6月底後退休享受家庭生活。
點知梁振英在12月8日星期四通知林鄭：棄選特首，不尋求連任。12月9日下午3時半梁特正式公開呢個消息之後，葉劉淑儀立即見傳媒，掩不住從心內笑出來嘅笑容，成個未來特首咁款。於是林鄭不甘蝕底，在12月10日就主動見傳媒話及「巨變」：「我不能不重新考慮我自己的情況」。沒有了梁振英，林鄭的真本性，英文所謂true colour表露無遺！有野心做特首，以前講退休只因梁特霸咗頭位啫。
人人有轉軚自由，林鄭前言不對後話，是否爭取到選委一票，自有政治現實作決定。佢有丈夫有兩個兒子，平時十分低調，唔似梁太梁千金不時成為新聞人物，令梁特頭痛，令梁特形象不佳。林鄭話「自己係梁特首嘅最緊密的合作伙伴，完全理解梁特的棄選決定，對香港情況感到悲哀，原來在保護家庭和服務社會之間是不能並存，從政者必須作出相當艱難抉擇，寄語香港社會都要為此反思」。嘩嘩嘩，真係賴得就賴，香港社會點解要反思呀？林鄭係港大才女，老公係大學教授，有冇讀過「大學」之「格物致知修身齊家治國平天下」呀，港大校訓就係「明德格物」！梁先生家庭老早傳出新聞，梁千金齊昕曾是網絡焦點，唔係報紙作古仔作出來嘅。林鄭可以齊家，梁特為何不能？梁特之家庭事由佢負責，香港社會何須代佢反思？董特首何來要在家庭與公職中抉擇呀？林鄭護主心切，都唔須要將梁特家事入埋香港社會條數啫。呢位Plan B人物緊跟梁特，如果由佢上台，香港人仍是沒有梁特的梁特路綫主政。