距離2017年3.26特首選戰得嗰四個月都冇，有心出選特首嘅人士，理應已經浮晒面，偏偏政圈呢排就不斷瘋傳，特首寶座嘅真命天子另有其人，唔係政務司司長林鄭月娥、財政司司長曾俊華或新民黨主席葉劉淑儀，而係大家估佢唔到嘅人。到底係邊位？最新黑馬大熱係個「好」字，就係世界衞生組織總幹事陳馮富珍及港大校務委員會主席李國章，但有知情人士就提出理據話唔似。
政界流傳真黑馬未現身
先講陳太，2003年去咗世衞嘅佢，明年6月卸任總幹事。早前有關佢選特首消息流出後，陳太自己都回應過，話屆時已經70歲，希望退休享天倫樂。由於講過N屆唔選嘅人都會繼續去馬，所以啲人對佢自行落閘仲半信半疑。
有心水清人士卻指，《基本法》列明嘅特首參選人要求，當中包括在香港通常居住連續滿20年等五大條件，而陳太則喺2003年到世衞工作至今長達13年，似乎未必過到呢一關，唔似真正禮賓府主人。
至於李國章，撇開佢嘅惹火度同梁振英不相伯仲呢一點唔講，其實都年屆71歲，雖然可能仲有心有力，但蜜運中嘅佢能唔能夠分身處理政事？相信都會有唔少人質疑！
到底邊個先係真正黑馬？有建制中人話，至今仍然有特使問佢，仲有冇其他好嘅特首人選推薦，似乎未到選舉大直路，大家都要睇路咯！
李八方
mailto:[email protected]