有時真係唔知騎師行運，定抑或人間有情？這晚谷戰在祈普敦及潘頓停賽下，大摩將上次分別由祈、潘呢對鄉里騎師操刀的「勝一籌」及「海翡翠」，交晒俾就快停賽一個月的韋達跑。結果韋達冇錯過機會，夥拍呢對實力馬一追一放，贏完一隻到一隻，結果大摩全晚出兩駒全勝，馬房今季首次於谷草起孖。
其中「海翡翠」列陣第六場三班1200米華協會百週年紀念金盃，此匹三歲馬上仗初跑谷草，於四班1200米配潘頓一放到底大勝4.5馬位創今季贏最遠紀錄，今次換上韋達跑高一班而途程照舊。結果十三少做番應做的工夫，從8檔起步後慢慢將座騎移入，然後貼住內欄慢放，就此由頭帶到尾輕勝2.75馬位而回，「海翡翠」連捷保持谷戰不敗，兩場加埋贏7.25馬位，而今場單Win及組合獨贏A1分別派25.5及17元。今晚同時係韋達、大摩今季首次同日合作起孖。
大摩表示韋達初來港策騎時，大家已有合作是好朋友，也是合作夥伴，眼見近期韋達缺少實力座騎，而愛將祈普敦及潘頓停賽，所以願意幫他一把。大摩幽默地說已約定韋達，聖誕一起在泰國布吉嘆香檳食雪茄。大摩又指「海翡翠」連續兩仗自領步速表現上佳，尤其今仗升上三班仍可輕勝，反映牠十分喜歡快活谷，仍有上升空間。
今場由最熱四駒包辦前四名，其中二至四名順序為「騰龍超影」、「魔連奴」及「超凡夢想」，四重彩派1,885元係整晚暫時最奀一場，而三T正獎有人中，每注派7,741元，亦係季內最低紀錄。