葉楚航做過本港冠軍練馬師，剛周日以「天才」於香港盃跑第二，佢拎到個人於國際賽首次入Q。這晚快活谷葉楚航亦踏上里程碑，於第三場五班1800米贏出「蒜頭爺爺」，是個人從練第600場頭馬，而「蒜頭爺爺」初跑谷草增程首次角逐1800米，飛起韋達首配莫雷拉即開齋，單Win及組合獨贏A1分別派43及20元正。
「蒜頭爺爺」馬名趣緻，馬主之前養過三捷馬兼13年經典一哩賽亞軍「蒜頭仔」，而四歲新西蘭自購新馬「蒜頭爺爺」上次泥地一哩跑第五已有進步，今勻換雷神留前鬥後，無驚無險以個多馬位之先衝贏對手，人馬表現都好有交代，當中雷神更再破紀錄，擴展至連勝24次賽事未斷纜，走勢勁到無倫。
葉楚航表示一直有計算自己頭馬數字，本預計聖誕節左右可以取得600Win，結果由「蒜頭爺爺」達到此大關，意義重大，因為馬主由葉楚航做騎師年代已一直支持他。葉楚航指「蒜頭爺爺」性能偏長，但仍很稚嫩，馬兒自信心不足，仍有很大進步空間，今場莫雷拉亦有功勞，轉彎時慳了不少位，此馬身子較為薄弱，希望養壯後有更佳表現，以報答馬主多年支持。
今場低班賽開出熱頭冷腳，亞至殿軍都係冷馬，順序為為「精彩時機」、「馬來之珍」及「華麗再現」，四重彩派六萬蚊鬆啲。