退休法官胡國興公佈政綱，表明首要處理政治改革，單係呢一點，八方相信佢未必得到全國政協常委、上屆獲綠燈入閘但大熱倒灶嘅唐英年支持，點解？皆因唐唐對新特首有個期望，就係任內唔好重啟政改。嘩，乜唐唐唔想香港政改更民主、更有進步咩？非也，查實佢係覺得，未來五年應該休養生息，搞好民生經濟儲定彈藥再談政改。
稱今屆應集中經濟
原來唐唐認為，新特首上場呢五年，香港應該集中精力發展經濟，事實上內地如上海等城市，已經趕上香港，仲唔發力就前景堪虞。而爭取成為亞投行財資中心、扮演國際調解中心角色、促進文化產業等等，都係佢覺得下屆特首嘅重任；與此同時民生都唔可以忽略，成立政府公積金、引入失業保險等議題，都係新任特首應該聚焦。固本培元壯大實力後，再下一屆傾重啟政改都未遲。
如果最終無特首候選人表明唔重提政改，咁唐唐會唔會送上提名？佢冇正面回應，只稱暫時唔知邊個出嚟選，但認為可以讓有能以及有志者，同時入閘，公平競爭。唔知上屆嘅唐營選委，今屆又會撐邊一位？