唔理前面係紅燈定綠燈，財政司司長曾俊華決心辭職，為特首選戰再掀高潮！唔少政界話鬍鬚曾勇氣可加，皆因阿爺真係未拿定主意，而鬍鬚曾對特首戰咁義無反顧，至少冇令一班粉絲失望，暫時唔知道人氣高企嘅佢可唔可以憑民望力爭阿爺支持，但據知財爺嘅支持者、即係薯粉都留意到阿爺對鬍鬚曾有三大質疑，於是為佢逐一解畫開路！
話曾經「神秘失蹤」兩三年
到底阿爺唔信鬍鬚曾，有邊三個原因？八方相信有啲政界中人都聽過北方來的風聲，包括鬍鬚曾長年喺美國居住，作風太番書仔，其實呢點都唔係太大問題，因為唔少建制中人都喺外國放洋留學，奇就奇在，唔知點解傳到鬍鬚曾回流前，有兩三年唔知做過乜，行蹤神秘到令阿爺起疑喎……
有薯粉就話打聽過，當年鬍鬚曾都係做緊正常嘢，唔講唔代表有古怪，絕對唔係一如建制派流傳所謂勾結外國勢力。
至於做過前港督彭定康私人秘書呢項「罪名」，薯粉就覺得係莫須有，皆因當時做𡃁嘅鬍鬚曾，都係打好自己份工箒；肥彭讚佢表現好，仲證明佢唔係hea做㖭！
最後一點呢，有傳阿爺對佢同前特首曾蔭權稱兄道弟都唔多like，尤其煲呔仲係曾爵士喎；但薯粉就話喎，鬍鬚曾喺2011年修訂預算案大派6,000蚊後，已經同反對派錢嘅煲呔關係大不如前，絕對唔再係親密戰友喎，而呢點呢……政界或者都半信半疑。
唔知道薯粉呢三點反擊，會唔會令鬍鬚曾特首之路更易走？八方只知特首選戰好戲連場，唔同陣營嘅刀來劍往，陸續有嚟！
李八方
mailto:[email protected]