唔少年輕人覺得上一代議員係舊電池，但薑始終越老越辣，好似今屆選委會選舉，多個界別嘅票王都係過氣立法會議員，屈指一數至少有4個。
好似民主黨前立會議員張文光咁，佢喺教育界共奪26,684票，係所有當選選委中，得票最多嘅王中之王。另一位民主黨前立法會港島區直選議員單仲偕，亦都喺資訊科技界奪4,806票，成為票王。同樣係泛民票倉嘅社會福利界，今屆有兩位票王，一位係莊陳有、另一位係社會福利界前議員、工黨張國柱。
而泛民取得15個議席嘅工程界，票王則由建制派、77歲嘅前立法會工程界議員何鍾泰奪得。
高舉ABC旗幟嘅自由黨榮譽主席、前商界兼前新東直選議員田北俊，雖然未能喺商界做票王，但佢得票都係第二高，只係低過獲佢提攜嘅黨友陳浩濂。田少喺fb貼出呢個輝煌成績，仲話「唔阻住大家食花生」；即使做唔成票王，霸氣依然。