「俊？邊X度俊呀？睇過！」相信大家都知呢個對白嘅出處，就係《三五成群》入面神仙B同大王(宋本中)嘅一句經典對白。
不過o依家大王唔使再俾人凶，而且仲由演員升呢做導演。事關佢o依家執導網劇《反黑》，而且呢套網劇卡士強勁，有陳小春、李璨琛、陳惠敏、吳志雄、陳國坤、吳岱融、陳嘉桓等等，一眾演員都有喺微博post出同拍攝時嘅劇照。
雖然「廿八座大王」呢個角色成日俾人攞出嚟笑，但係呢個角色同樣令好多人記得宋本中。睇番資料，其實宋本中喺91年已經入行，電影、劇集都演出過，好似《新邊緣人》、《廟街故事》、《百變星君》、《三五成群》等電影入面佢都係做一啲嘍囉、古惑仔嘅角色。02年宋本中開始退居幕後，06年開「影視兄弟製作公司」，13年喺大陸發展做導演。之前樂視網劇《天才在左瘋子在右》都係由佢執導。