彭羚為Wyman出山做嘉賓林家小圈子投票唔俾復出

彭羚為Wyman出山做嘉賓
林家小圈子投票唔俾復出

47歲嘅彭羚1990年入行,出道冇耐就已經極速爆紅,被視為「九十年代四大天后」之一,而佢喺98年仲同林海峰結婚,婚後彭羚都繼續唱歌,翌年仲宣佈有喜,2000年幫老公誕下大女林泳。喺2004年彭羚再度懷孕,同年生咗二女林清,之後就淡出幕前,甚少再見佢演出。

天后淡出,唔少人都想再見彭羚演出,而有能力令佢「出山」嘅就係Wyman黃偉文,佢喺2012年喺紅館舉行《Concert YY 黃偉文作品展》,仲搵到彭羚擔任其中兩場嘅表演嘉賓。當中,彭羚除咗唱咗自己嘅《小玩意》之外,仲分別同容祖兒合唱《心淡》及黃耀明合唱《漩渦》;另外,仲喺尾場壓軸同其他嘉賓一齊合唱《給我愛過的男孩們》,而喺演唱會後,希望彭羚復出樂壇嘅呼聲越叫越旺,不過之後老公林海峰接受訪問就話:「我哋屋企有4人小圈子投票,2票反對,1票贊成,1票白票,我哋尊重結果,香港未有普選,樂壇都冇,所以復出唔成立。」之後,彭羚出席活動時仲話呢個係佢自己嘅決定,唔關老公事咁話!

之後再次令天后「出山」嘅就係為咗慶祝母校民生書院90周年校慶,佢仲同陳秋霞、林志美合作灌錄新歌《光與生命》。