年28歲的大隻仔趙勁皓（King）與27歲、𡃁模出身的盧頌之（DaDa），在2013年合作電影《爆3俏嬌娃》撻着，DaDa最近為King陀女6個月，預產期是明年3月。
請定陪月
DaDa有喜，但King曾戲言給她一年時間生B，冇得生便分手，惹來網友圍插King大男人。King與陳柏宇、拳王「風之子」杜恒霖等友人在旺角的饅頭漢堡店即將開業，DaDa前日夫唱婦隨陪King巡舖，DaDa替King解畫：「佢話泵唔大唔要我係講笑，我哋相處係咁，成日互窒，其實佢係暖男，唔係搵我做生仔機器。」兩人已計劃入紙註冊結婚，待DaDa收身後，便會出埠補影結婚相及擺酒。
早前陪DaDa去做產檢，King透露見囡囡在肚內「郁郁吓」感動到喊，DaDa忍不住寸King：「但你嗰時掛住打機囉，希望我生，你陪我入產房，唔係掛住打機。」King承諾一定陪DaDa入產房，但仍考慮會否剪臍帶，並坦言要DaDa繼續生，他說：「我想要仔，但呢胎係女，所以會再生，希望有兩個，一仔一女。」不過，囡囡是爸爸前世情人，他說：「𠵱家成日上網睇湊女，我心情都興奮，我想準備好啲，請定陪月同司機。」
家用任使
King除開食肆，還開健身院和酒吧，DaDa婚後打算叠埋心水幫King打理生意兼做家庭主婦，問King會否添家用？他說：「我哋啲錢共用，我哋冇共同戶口，我會袋住啲錢，任佢攞。」原來King是巨型「人肉提款機」，難怪DaDa甜笑不停。
採訪：陳杰
攝影：陳俊強