星期日跑馬之後，吃過晚飯，就走去票站投票，左丁山屬高等教育界，參選人名單有65人，好多位都無緣認識，於是投票俾一啲知名大教授及比較熟悉嘅中大教職員。跑馬之時，有好多傳媒人在座，講馬就係左丁山專門，講政治消息就係佢地收埋不少消息，於是話題離不開四場國際賽嘅可勝馬匹及為何梁振英在上星期五（12月9日）突然宣佈不尋求連任。消息傳聞多籮籮，難分真假，但大家一致同意，「成報」連月痛罵張德江、張曉明與梁振英，不見文匯大公落力護航或反擊，原來係「可能是真的」，內幕幾惹人尋味。
大家又猜估梁特即將下台，泛民爭選委以ABC為口號，會不會落空，降低選民投票意欲呢？唔通在選舉前就宣佈唔選，係一種選委選舉策略？好多嘢係無法估中嘅，星期一早上知道今次投票率高達46%，有十萬七千人投票，係歷史新高。當日選舉陸續揭曉，泛民及非建制派竟然獲得327個選委席位，數目之多，相信泛民亦估唔中，左丁山所屬嘅高教界，「高教界民主行動」大獲全勝，掃晒30席，陳健民戴耀廷等知名「佔中派」壓倒晒知名大教授王于漸、廖柏偉、宋恩榮、雷鼎鳴、劉智鵬等人，此外非建制派亦橫掃IT、法律、社福、教育、衞生五個界別，在梁振英票倉建築及測量界奪取26席，著名梁粉鄔滿海僅以最低票數當選，又在會計界奪得26席，令畢馬威合夥人劉麥嘉軒嘅團隊大敗，嘩，變天咯，打電話問過幾個界別嘅專業人士，佢地話投票率急升，可能係不少較年青專業人士「起義」，紛紛出來投票，用選票送走建制派候選人，令梁派票倉崩潰。
既然如此，選委會有1200席位剔除重複席位，有1194人，泛民佔327，即27.4%，足夠票數提名兩位特首候選人，但建制派仍佔多數嘅867票，有足夠票數選出另外一位689。中央點樣擺計呢？如有兩位建制派人士參選，勢均力敵的話，就爭唔到601票，葉劉與想轉軚嘅林鄭只能俾一個入閘，確保有過半數選票當選；但曾俊華又醒噃，星期一就辭職，梗係參選啦，搶得先機，可以逼林鄭入牆角及葉劉重新考慮。畢竟泛民之327席，可以成為關鍵少數，曾俊華嘅希望高一線。中央會唔會索性向葉劉、曾俊華兩人出紅牌嚟力保梁振英指定接班人林鄭呀？梁振英扔下政治爛攤子，中央唔激氣就假。