一如所料，毫無驚喜，基斯坦奴朗拿度（C朗）放到離晒巷，以745分擊敗美斯同基沙文，第四度贏得金球獎。C朗呢次真係眾望所歸，第二名至第六嘅分數加埋晒都唔夠C朗一個咁多！
今年國際足協金球獎分家，好似2010年之前咁，分拆為《法國足球》舉辦嘅金球獎，同埋國際足協搞嘅世界足球先生。金球獎喺香港時間禮拜二凌晨宣佈，C朗高票當選，獲得745分；美斯就畀佢拋開成條彌敦道得316分；應屆歐國盃最佳球員基沙文就以198分排第三。
領葡軍奪歐國盃
C朗今年幫皇馬拎咗球會史上第11座歐聯冠軍，之後仲以隊長身份，帶領葡萄牙歷史性贏得歐國盃，實至名歸。由美斯數起到第六位嘅加里夫巴利，佢哋嘅分數加埋都唔夠C朗高。
《法國足球》嘅金球獎由173名記者選出，以專業見稱，雖然事隔六年再度獨立頒獎，但佢哋嘅頒獎同宣佈方法就同以前冇乜改變，都係唔搞頒獎禮。
喺宣佈之前，C朗已經知道，因為主辦方早就搵咗C朗講得獎感受同影雜誌封面，真係冇晒神秘感，唔怪得賽果畀部份西班牙傳媒外洩咗啦。31歲嘅C朗帶埋阿媽同囝囝一齊接受訪問，佢話：「好榮幸第四次拎起呢個獎，嗰種激動同第一次拎嗰陣一樣。我從未諗過自己贏到四次，我好開心。我要喺度多謝國家隊同皇馬嘅隊友，如果冇球隊喺大賽嘅勝利，我根本唔會贏呢個獎，所以我一直都以團隊為先。」家陣C朗喺日本同皇馬一齊備戰世冠盃。皇馬隊長沙治奧拉莫斯亦有心思，當金球獎公佈結果後，就送咗個金球獎蛋糕畀C朗。
頭六位全係西甲兵
今屆金球獎西甲威盡，頭六位都係西甲球員，至於第七同八位就係幫李斯特城奇蹟贏英超嘅兩大功臣馬列斯同占美華迪。較令人意外嘅係，葡萄牙門將魯爾柏迪斯奧都有六分，仲高過伊巴謙莫域、保羅普巴同莫迪歷等球星。另外，喺最後30人候選名單中，唔少球員一分都冇，例如阿古路、奇雲迪布尼、恩尼斯達、紐亞同拉莫斯都冇記者投佢哋。
