大家見到皮蛋黃(黃興桂)，梗係諗起足球啦，但佢同馬圈人士亦行得好埋，係冠軍騎師雷神莫雷拉嘅好朋友。兩個成日約埋一齊出嚟踢波。
黃興桂說：「佢(雷神)會打電話畀我，問我幾時有波踢呀？幾時有波睇呀？佢同我傾偈係傾人生哲學、宗教。啲人話皮蛋王你同雷神咁老友，實係希望喺賽馬方面搵到啲着數，但其實做人最緊要冇心術。」
雷神騎馬出神入化，咁佢踢波又點呢？桂神話雷神係巴西人，有基本技術，隻黃金右腳非常厲害，球技有香港甲組水平，但唔夠料踢港超聯，因為雷神身輕細粒，同啲大大隻嘅職業球員相撞好吃虧。
桂神又話自己同賽馬嘅緣份始於10歲。當時佢爸爸同練馬師蘇偉賢爺爺住樓上樓下，自己偷聽佢哋兩個講馬經，覺得啲馬名「空中霸王」、灰馬「螢火」等好有趣，自此愛上賽馬。