人人都用社交媒體建立個人形象，原來新世界發展（017）執行副主席鄭志剛亦好此道，佢仲嫌facebook已經「out out哋」，主要玩Instagram同微信。不過大家唔使諗多咗，佢冇分享私人生活，冇遊艇、美食、靚女相，主要係分享佢個人藝術之旅㗎咋。
鄭志剛一向熱心推廣藝術，佢個IG有成4萬幾個粉絲，咪以為全部都係新世界員工，入面有好多係外國藝術工作者。而佢個微信賬戶，就不時講講最近佢參觀過邊個藝術展覽。
講完藝術，當然都要提一提政治，最近特首選戰鬧得熱哄哄，鄭志剛係選委之一，點都有啲睇法嘅。可惜，呢日佢同大部份選委一樣封口，好行貨咁話，都未知有乜人選，點表態啫！