職工盟秘書長李卓人（圖）敗選立法會後一身輕，自然更專注處理工會事務，上周佢就以觀察員身份到峇里出席國際勞工組織（ILO）亞太區大會，仲喺答問環節成功搶閘、舉手提出首個問題，批評香港冇集體談判權。
阿人同八方講，同場嘅勞工處助理處長李寶儀忍唔住反駁，話港府一直鼓勵自願談判，大會主持即刻將李寶儀軍，話𠵱家係提問環節，寸佢唔係提出問題而係發表聲明喎，國際工會聯盟亞太區（ITUC-AP）主席Felix Anthony都當場炮轟港府「自願談判」毫無意思，一定要有法律保障先掂。
中國勞工部都有代表出席會議，阿人當然唔錯過黃金機會，力數中共喺一黨專政下冇真正嘅勞資官三方對話，又批評中共打壓廣州工運，中方代表一味解釋中國有三方對話促進和諧囉。