民主派喺選委戰中嘅專業界別戰績彪炳，幾乎派幾多人就贏幾多席。以資訊科技界為例，上屆派20人奪20席，今屆更一席不留建制派，橫掃30席。其實立法會選舉結果已經睇到勢頭，所以唔少建制IT人今屆轉界別避險，就連業界前立法會議員譚偉豪都唔敢正面迎戰，今屆喺工業界（一）自動當選。
除咗譚偉豪，上屆喺資訊科技界落敗嘅陳細明、鄭松岩、吳傑莊等，今屆分別轉咗去香港中國企業協會、金融界同演藝小組，前兩位係自動當選，吳傑莊亦成功喺演藝小組取得一席。
睇番上屆該界別當選嘅建制派，例如洪為民，今屆再戰都成炮灰，睇嚟轉戰其他界別係明智之舉。八方問過吳傑莊，佢話明將來若有機會同特首候選人交流，除咗所屬界別議題，一定反映埋IT界嘅訴求㗎。