肥媽Maria Cordero有義氣就眾所周知，而佢錫陸浩明（6號）亦唔係秘密，佢哋兩個由2013年開始拍檔主持《食平D》開始，3年內再拍檔主持《食平DD》、《食平3D》、《暖DD‧食平D》同《今個夏天食平D》，平均唔使一年就添食一輯，實在係唔講得笑。
肥媽更喺舊年6月同6號正式上契，而呢對「母子」唔單止一齊主持節目，仲拍住上一齊拍廣告做代言，至於肥媽就算自己接到job，都會帶挈6號做司儀，總之就有錢齊齊搵。
喺早兩個月，肥媽同6號一齊拍廣告時，提及6號同女友去澳洲慶祝拍拖5周年，肥媽就乘機催婚，6號「借啲二」叫肥媽平租物業畀佢，搞到肥媽鬧佢「病入膏肓」，但鬧還鬧，肥媽話如果對方真係結婚，會預備龍鳳鈪同金豬畀契新抱，仲開到口話想快啲抱契孫。