民主派喺新一屆選舉委員會報捷，唔少界別全取兼有零的突破，而喺資訊科技界以「IT Vision」名單上陣嘅香港資訊科技商會榮譽會長方保僑呢，當選之餘仲雙喜臨門，皆因佢咁啱喺12月11日投票日生日，IT Vision隊友前晚凌晨就喺亞洲國際博覽館點票中心送上蛋糕，為佢慶祝48歲生日。
願望係有真普選
方保僑話生日願望係香港有真普選，當時仲未知會當選嘅佢話，若然有幸手執一票，提名、投票畀邊個做特首要再作討論，當然最重要都係睇番特首候選人嘅政綱以及佢哋對真普選嘅立場。
方保僑特別質疑葉劉淑儀只係執梁振英死雞，仲話對方嘴臉好似重回當年硬推23條之時，覺得曾俊華同林鄭月娥比較容易溝通呀。