立法會教育事務委員會噚日討論爭議性十足嘅TSA，未知委員會主席蔣麗芸係咪護儉心切，多次出言幫教育局局長吳克儉解圍，更使出奇招令平日能言善辯嘅鄭松泰都話講唔到嘢。
話說鄭松泰席間質疑局方喺未有授權下使用TSA數據，主席元秋隨即話議員唔應該向局長、而應該向主席發言，要求佢「你對住我講嘢」，泰博聞言嚇到沉默幾秒先識回應：「唔係嘛，對住你講嘢，我講唔到。」全場大笑。元秋打蛇隨棍上，話泰博發言時間已盡，成功打斷佢提問。泰博試過反擊，喺委員會副主席葉建源發言時提出規程問題，指葉未有望住元秋，元秋隨即笑佢多事：「呢個係我同佢（葉）之間嘅事！」搞到泰博耍手擰頭投晒降。