鄉議局今屆選委戰好激烈，26個議席有35人去爭，有傳屬南約嘅唔少離島區鄉頭不滿分餅仔不公，自行報名參選，矛頭直指新上場嘅主席劉業強。離島區5個鄉委會主席，包括長洲翁志明、南丫南周玉堂、大澳劉焯榮、梅窩黃文漢、坪洲黃漢權統統當選。反觀被視為發仔嫡系重臣、以太平紳士身份入局嘅參選人，包括林國昌、謝國生同梁和平就全數敗選。
上水鄉委會主席侯志強僅得60票，同另一人同樣以最低票當選。若然元朗新田鄉委會主席文炳南同副主席文祿星唔係同時出選分薄票源以致雙失，侯志強可能冇埋呢席！侯志強係局內組黨派，早前新東立會選戰拉隊出戰據聞惹嚟唔少人不滿，覺得佢巴之閉，唔排除有鄉紳用選票表態。