做藝人嘅嘢，有時唔係真係靠靚仔就sure win，好似陸浩明（6號）咁，雖然走「實力派」，但勝在抵得諗，唔介意做「下把」，任鬧任寸任奚落，所以同肥媽Maria Cordero做節目添食再添食，另加無綫本身啲騷同主持，以及外面啲司儀job，6號賺埋賺埋都幾和味。
不過，由有線過檔無綫嘅演藝員，係咪個個都咁好景？
李潤庭
呢幾日由前「新聞王子」變成千夫所指嘅李潤庭，因為被揭背妻激咀小三而送上星途，就算開晒記者會道歉都好，似乎都唔係幾為人接受，睇怕佢短期內都冇得曝光，最壞嘅情況，可能係食豉椒炒魷o添。
區永權
同樣係人夫嘅區永權，有指佢為人較為圓滑，加上係余詠珊愛將之一，所以舊年正式過檔無綫後，不乏曝光機會。單係佢常規性咁擔任《東張西望》主持呢個位，已經可以加深觀眾對佢嘅認識，提高知名度。
黃翠如
翠如BB應該係由有線過檔最好景嗰個！劇集、節目接住嚟，最近喺《幕後玩家》嘅演技備受注目，而身為「BB級」嘅佢，前年公開同蕭正楠相戀，冇俾公司掟入雪櫃之餘，仲job接job，又試過情侶檔一齊搵錢，有幾多個人可以好似佢咁？
洪永城
講得黃翠如，梗係要提埋洪永城，原本全球人都睇好佢同翠如BB係一對，不過，BB拍拖了，男友不是自己，都唔緊要，反正洪永城喺無綫有大把旅遊節目拍，又可以拍吓劇咁；感情方面，同唐詩詠又越見明朗化，都叫順風順水。
陳貝兒
周身刀嘅陳貝兒除咗無綫嘅主持同司儀工作之外，其實仲有好多副業，包括擔任非牟利團體Green Monday嘅執行總監，推廣全民逢星期一吃素嘅健康理念，形象正面，所以佢星途應該好穩陣。
衛志豪
喺有線做開主持嘅衛志豪，於前年過檔無綫，雖然佢曾經主持過《尋謎博物館》等綜藝節目，又擔任《娛樂3兄弟》、《一綫娛樂》同《煒哥的味道》主持，劇集方面都唔係擔正嘅，比較近嘅就係喺《巨輪II》中扮年輕版高天鷲，同《幕後玩家》演Marco，其他嘢，真係好少見到佢，有傳佢成日扮大佬，啲幕後都麻麻哋佢，所以演出機會……