今時今日，邊度仲有免費午餐呢？答案係永隆銀行。
原來永隆中環總行與旺角旗艦分行，員工飯堂都為永隆同事提供免費午餐，此乃前控股股東伍氏家族，留下來嘅優良傳統，招行（3968）2008年中收購永隆後，仍維持呢項德政。
永隆在港員工逾1,600人，飯堂供應嘅免費午餐，多是家常便餐，但據聞大時大節，試過有龍蝦甚至鮑魚供應，而平日提供嘅例湯亦非常老火入味，雖然其他分行因為冇飯堂，同事未能享受此優惠，但有飯錢補貼。
本地大行中，華華聽聞中銀香港（2388）位於中環嘅中銀大廈，員工飯堂亦有提供每位只係10元嘅特惠午餐，相當吸引，飯堂亦中西美食俱備。
講番中環永隆大廈21樓嘅宴會廳，佢哋個廚房，喺華資銀行界都頗有名，好似西施骨日月魚燉猴頭菇湯、甜品木瓜杏仁茶，都相當滋潤合時！