梁特利用釋法權威，在立法會趕走梁頌恆、游蕙禎，意猶未足，還要司法覆核梁國雄、羅冠聰、劉小麗、姚松炎四人嘅議員資格。梁特與袁國強口口聲聲話此舉沒有政治目的，幾難搵人相信。
前日中午與政治編輯在置地廣場碰到，一齊踱步行咗一個圈，向佢請教假如法庭又試褫奪四人的議員資格有甚麼政治效果，政治編輯話：「後果可大可小，視乎補選結果而定。嗱，假如淨係趕走九龍西游蕙禎，新界東梁頌恆兩人，兩區各有一個空缺，補選實際上變成單議席單票制，泛民只要有協調，不互相殘殺鎅票嘅話，好有機會贏番兩席，即是冇損失。但假設新界東梁國雄，九龍西劉小麗亦出局嘅話，咁樣新界東與九龍西就各有兩席要補選，又變回比例代表制選舉，民建聯與工聯會各派一人參選嘅話，根據過去嘅選票分配黃金定律，泛民佔選票大概六成，建制派佔四成嘅話，泛民幾難贏番四個直選席位返嚟，有兩席可能就此奉送俾民建聯工聯會，於是泛民在直選議席數目就由18變成16，少於半數，令建制派可以同時取得功能組別與直選組嘅過半數，通過政府法案變得容易。
另外，估計泛民可以爭到羅冠聰之港島區補選議席，但姚松炎之席位就凍過水咯，單打獨鬥嘅話，姚松炎在建築、測量、都市規劃及園境界輸得嘅啦，上次入選，係多得林雲峯搶走部份謝偉銓嘅選票嘅啫。」
聽完政治編輯嘅分析，政府趕走一啲泛民議員，待補選時搶走一啲原本係泛民嘅議席，實在有好大政治後果，但梁特與袁國強不斷話司法覆核上述四位議員，不含政治目的，真係當香港市民係幼兒院學生，侮辱我哋智慧。明年就是香港回歸中國第20年，林鄭月娥早前提及有盛大慶祝，預料一定大鑼大鼓宣傳回歸後香港如何進步，人民生活比英治時代幸福等等，但到咗七月一號，梁特已不在其位，如果林鄭變成普通平民一個，豈會甘心，豈肯將慶祝典禮嘅排頭位雙手奉送予他人呀？單係呢點，已可知梁營為咗連任，鬥志昂揚，不擊敗對手那肯罷休，梁特既已玩完，林鄭進場好合邏輯啫。12月5日之曾俊華在立法會宣讀政府立場事件，已披露兩個陣營之暗鬥十分激烈。今日在聲勢宣傳方面，梁營暫時勝在有報紙助陣，利於發放心戰消息，目前仲未見到有報紙敢明顯為曾助拳，變成有少少捱打局面，梁營Plan B係林鄭掛帥，佔有優勢。